ลำพื้น เรื่อง พญากวางคำ
เกริ่น
บัดนี้ มาจักเล่าภาคพื้นองค์เอกอรหันต์ คราวเมื่อองค์จอมธรรม์สัญจรเที่ยวยั้ง
คอยฟังเอาเด้อท่าน สิไขกลอนแถลงข่าว
ชาดกองค์พระเจ้า แต่คราวกี้ก่อนหลัง
ตั้งแต่เพิ่นอยู่ยั้งเที่ยวท่องสงสาร
ก่อนสิเป็นโพธิญาณได้ท่องโลกากว้าง
เกิดเป็นกวางโตแก้วแสนงามเถิกถ่าว
หากแม่นพระบาทเจ้าแนวเนื้อหน่อพุทธัง
เกิดมาบำเพ็ญตั้งเตื้องต่อบารมี.....สร้างแต่คุณความดีบ่ห่วงหยังทั้งนั้น........
ลำ
เอาเด้อ คันโจ๋พากบั้นกวางคำล้ำค่า เจ้าหากลงจากฟ้ามาเกิดอยู่ไพร
แล้วจั่งได้นกใส่เกิดมา อยู่ในกลางไพรหนากับทั้งเต่าน้อย
วอย วอยดั้นเช้าแลงเพียรพ่ำ (ซ้ำ) พากันเนาอยู่ก้ำเคียงข้างแห่งกวาง
นกใส่ท้วงยามเมือมีภัย แล้วจั่งไวทางบินแอ่นถลาลอยฟ้า
พญาท้าวกวางคำโตอาจ หากฉลาดลื่นแท้เก่งกล้าเกิ่งคน
หนีบ่พ้นจากหมู่เวรกรรม พญากวางทองคำกรรมนำเวรต้อง
กวางเที่ยวย่องแม่นทีฮิมเถื่อน เลยละเอาตนเคลื่อนลงอาบดื่มกิน
ยังบ่สิ้นดินเล่าเป็นทาง มีเทิงฮอยเสือสางหมู่แนวซุมช้าง
พรานนำม้างจองเวรครั้งก่อน มาสิได้กล่าวย้อนบ่อนนำใช้ส่งกรรม
จักกล่าวก้ำพรานเขาป่าหนา จึงได้มาพานพบฮอยบาทาเท้า
พรานจึงเด้อพรานจึงรีบฟังฟ้าวห่างบ่วงลงใส่ กวางกะเลยดุ่มไปติดบ้วงเหล่าคา
ภายภาคหน้าสิเป็นสิ่งสันใด๋ ขอให้ติดตามไประหว่างตอนฮอนบั้น
นาย เทอดพงษ์ นันทะมิตร ค.บ.ภาษาไทย ชั้นปีที่ 3 หมู่เรียนที่ 2 รหัสนักศึกษา 57210406214
ไม่มีความคิดเห็น:
แสดงความคิดเห็น